Jaslar turmısınan tayarlanatuǵın úzliksiz túrdegi jańalıqları menen xalqımızǵa jaqsı tanıs basılımlardıń biri “Qaraqalpaqstan jasları” gazetasınıń dúzilgenine bıyıl 90 jıl toladı. Jaslardıń birden-bir sırlasına aylanǵan bul jámiyetlik-siyasiy gazeta óziniń basıp ótken tariyxiy jollarında bir neshe talantlı jurnalistlerdi, jazıwshı-shayırlardı jetilistirip shıǵardı. Redakciyadan kóplegen qálem iyeleriniń “tisi” shıqtı. Búgin basılımnıń dúzilgenine 90 jıl tolıw múnásibeti menen rayondaǵı mádeniyat sarayında ushırasıw bolıp ótti. Rayon hákimi Jambul Adilov gazetanıń yubileyi menen qutlıqlap, redakciya jámáátiniń aldaǵı dóretiwshilik islerine tabıslar tiledi.

Qaraqalpaqstan xalıq jazıwshısı Muratbay Nızanov, Ózbekstanǵa xızmet kórsetken jurnalist Keńesbay Reymov, “Qaraqalpaqstan jasları” gazetası redaktorı Shınargúl Paxratdinovalar gazetanıń keshegi hám búgingi kúni haqqında sóz etti.

Gazeta ıqlasbentleri shıǵıp sóylep, ózleriniń pikir usınısların bildirdi.

Taxtakópir rayonı hákimligi Málimleme xızmeti