Taxtakópir rayonı «Qaraoy» awıl puqaralar jıyını aymaǵındaǵı «Iskender Taxta» fermer xojalıǵında 2022-jıldıń zúrááti ushın gúzlik biyday egisin belgilengen agrotexnikalıq ilajlar tiykarında shólkemleskenlik penen óz waqtında ótkeriw boyınsha kórgizbeli seminar keńes bolıp ótti.

Seminar keńeske Ózbekstan Respublikası Awıl xojalıǵı Ministriniń birinshi orınbasarı Sh.Teshaev, Qaraqalpaqstan RespublikasıMinistrler Keńesi baslıǵıniń orınbasarı S.Xojametov, Qaraqalpaqstan Respublikası Prokurorınıń orınbasarı Q.Bekmuratov, rayon hákimi J.Adilov, basqa da sektor baslıqları, rayondaǵı awıl xojalıǵına baylanıslı barlıq qánigeler qatnastı.

Rayonda 2022-jıldıń zúrááti ushın 62 fermer xojalıqları tárepinen 2800 gektar maydanǵa gúzlik biyday egiw rejelestirilmekte. Biyday egisine jer tayarlaw hám biyday egisin shólkemlestiriw boyınsha 6 otryad dúzildi.
Otryadlar quramına:
– Otryad baslıqları – 6 adam;
– Qániygeler (agronom hám SIU xızmetkerleri) – 11 adam;
– Támiynlewshi kárxanalar (dán, ximiya, neft) – 13 adam;
– Jer dúziwshiler – 6 adam;
– Egiste qatnasatuǵın mexanizatorlar – 84 adam qatnasıwı belgilep alındı hám
jámi 114 adam egiske juwapker etip bekitildi.

Biyday egisine qatnasatuǵın:
– joqarı ónimli traktorlar – 17dana;
– ápiwayı súrim traktorları – 13 dana;
– transport traktorları – 55 dana;
– tırmalar – 380 dana;
– ter tegislegishler – 11 dana;
– dán egiw seyalkaları – 7 dana;
– janar may tasıw quralları – 6 dana otryadlarǵa biriktirildi.
Solay etip, jaqsı niyetler menen kelesi jıldıń zúrááti ushın dáslepki biyday tuqımları egildi.

Taxtakópir rayonı hákimligi málimleme xızmeti.