Bárshege málim bolǵanınday, Prezidentimiz Shavkat Mirziyoevtiń basshılıǵında 7-iyul kúni júzim jetistiriw, onı sanaat usılında qayta islewdi rawajlandırıw hám aymaqlarda enoturizmdi jolǵa qoyıw ilajları boyınsha videoselektor májilisi ótkerilgen edi.

Onda mámleketimiz basshısı elimizde ázelden júzimgershilik dástúri bolǵanın, onı rawajlandırıw ushın úlken imkaniyatlar bar ekenligin atap ótti.

– Júzim jetistiriw– bul xalqımızdıń ásirler dawamındaǵı milliy diyqanshılıq mádeniyatı, qádiriyatı, maqtanıshı hám dáramat dáregi esaplanadı. Júzim xalqımızdıń turmıs tárizi hám úrp-ádetleri menen tikkeley baylanısıp ketken. Hár bir kóshede, shańaraqta júzim bolǵan, júzimlerdiń sortları uzaq-uzaqlarǵa shekem tanılǵan,–dep atap ótti Shavkat Mirziyoev. Sonıń menen birge elimizde júzim jetistiriwdi rawajlandırıw wazıypaların alǵa qoydı.
Mine, usı maqsette Taxtakópir rayonındaǵı Ózbekstan mákan puqaralar jıyını turǵını Ómirbek Temirbekovtıń úy aldı qıytaq jeri mısalında seminar-keńesi ótkerildi. Seminarǵa Qaraqalpaqstan Respublikası diyxan fermer xojalıqları juwapker qánigeleri, rayondaǵı 17 mákan hám awıl puqaralar jıyınları aqsaqalları menen awıl turǵınları qatnastı.

2021-2022-jıllarda 17 mákan hám awıl puqaralar jıyınlarında 500 shańaraqta 2,5 gektar maydanǵa júzimgershilikti jetilistiriw boyınsha rejelestirilgen bolsa, sonnan usı 2021-jılda 275 shańaraqlarda 137 sotıx hám kelesi 2022-jılda 225 shańaraqqa 112 sotıx júzimgershilik shólkemlestiriledi.

Taxtakópir rayonı hákimligi málimleme xızmeti