Korrupciya – bul jámiyettiń túrli jollar menen rawajlanıwın toqtatıp qoyatuǵın illet bolıp esaplanadı. Bul illet demokratiya hám huqıq erkinligi tiykarlarına zıyan jetkeredi hám insan huqıqları buzılıwına sebep boladı.

Sonı ayrıqsha atap ótiwimiz kerek, korrupciya illeti úlken- kishi mámleketlerdiń barlıǵında ushırasadı. Bul zıyanlı illetti joq etiw boyınsha jáhán jámiyetshiligi tárepinen bir qansha nátiyjeli isler ámelge asırılıp atırǵan bolsa da, házirgi waqıtqa shekem ol ele de joq etilgeni joq.

Kópshilik jaǵdaylarda xalıqtıń huqıqıy ańınıń pásligi yamasa tusinbeytuǵınlıǵı da lawazımlı shaxslarǵa óziniń jeke mápi jolında nızamlardan paydalanıwǵa qolaylı imkániyat jaratıp beredi.

Húrmetli Prezidentimiz óz lawazımına kirisiwi menen tastıyıqlaǵan eń birinshi hujjeti «Korrupciyaǵa qarsı guresiw tuwrısındaǵı» nızam boldı. Bul nızamnıń nátiyjeli orınlanıwın támiynlew, jámiyet hám mámleket turmısınıń barlıq tarawlarında korrupciyanıń aldın alıwǵa baylanıslı islerdi óz waqıtında ámelge asırıw maqsetinde Prezidentimizdiń 2017-jıl 2-fevraldaǵı qararı menen «2017-2018-jıdlarǵa mólsherlengen korrupciyaǵa qarsı guresiw boyınsha mámleketlik dásturi» qabıl etildi.

Dástur tiykarında bir qatar nızam proektleri islep shıǵıldı, ámeldegileri bolsa inventarizaciyadan ótkerildi. Ulıwma alǵanda, sońǵı jıllarda qılınǵan islep analizi xalıqtıń ańı hám huqıqıy mádeniyatın asırıwǵa qaratılǵan sistemalı islep ámelge asırılǵanın kórsetedi.

Reformalardı ámelge asırıw tiykarında puqaralardıń huqıq hám máplerin qorǵaw, mámleket basqarıwı hám basqarıw organları iskerliginiń ashıqlaǵın támiynlew, jámiyet hám parlament qadaǵalawın támiynlew mexanizmlerin ele de rawajlandırıw, sonıń menen birge, huqıqtı qorǵaw organları hám sud organları iskerliginiń huqıqıy tiykarları reforma qılındı.

Korrupciya sonday illet esaplanadı, onı bir yaki eki mekemeniń is-hareketleri menen toqtatıp bolmaydı. Barlıq puqaralarımız, jámiyet oǵan qarsı guresken waqıtta ǵana nátiyjege erisiwimiz mumkin.

Húrmetli Prezidentimiz tárepinen tastıyıqlanǵan bul párman menen sudlardıń ideyaları birligi biz ushın áhmiyetli bolıp, áyne uaqıtta pármanda belgilengen wazıypalardı turmısqa nátiyjeli eńgiziw boyınsha juwapkershilikti júkleydi.

Nátiyje qılıp aytqanda, bul pármán jámiyette ádillik ideyası, hámmeniń nızam aldında teńligi, puqaralardıń huqıq hám erkinlikleri, nızamlı máplerin qorǵawda áhmiyetli hújjet bolıp esaplanadı.

Nókis rayonlar aralıq hákimshilik sudı sudyası G.Baynazarova

 Taxtakópir rayonı hákimliginiń málimleme xızmeti