Taxtakópir rayonlıq Mádeniyat sarayında 8-dekabr – Ózbekstan Respublikası Konstituciyası qabıl etilgenliginiń 32 jıllıǵı múnásibeti menen «Konstituciya – erkin hám abadan turmıs kepili!» atamasında bayram saltanatı bolıp ótti.
 
Dáslep Ózbekstan hám Qaraqalpaqstan Respublikalarınıń mámleketlik gimnleri jańladı.

Ilajda sózge shıǵıp sóylewshiler, Konstituciyamızdıń áhmiyetli tárepleri hám normalarına toqtap ótip, bárshe qatnasıwshılardı bayram sánesi menen qızǵın qutlıqladı.
Haqıyqatında da, búgingi kúnde quyashlı Ózbekstan ǵárezsiz mámleket sıpatında qáliplesip, óz tariyxında burın ásirler dawamında bolıp kórmegen jetiskenliklerge erispekte. Ásirese, sońǵı jıllarda social-ekonomikalıq, siyasiy, ruwxıy-aǵartıwshılıq tarawlarındaǵı elimizdiń tabısların pútkil dúnya tán almaqta.



Bul tabıslardıń baslı deregi Ózbekstan Respublikası Konstituciyası negizinde Húrmetli Prezidentimizdiń basshılıǵında júrgizilip atırǵan keń kólemli reformalardıń nátiyjesi bolıp tabıladı.



Bayram ilajı rayonlıq Mádeniyat bólimi hám 17-sanlı Balalar muzıka hám kórkem-óner mektebi tárepinen tayarlanǵan koncert baǵdarlaması menen kóterinki ruwxta dawam etti.