Búgin Taxtakópir rayonı hákimliginiń májilisler zalında Xalıq deputatları Taxtakópir rayonlıq Keńesiniń gezektegi tórtinshi sessiyası bolıp ótti.

Sessiya jumısına siyasiy partiyalar, hákim orınbasarları, rayondaǵı mákeme, kárxana, shólkem basshıları, puqaralar jıyınları baslıqları hám jergilikli ǵalaba xabar quralları wákilleri qatnastı.

Sessiyanı Taxtakópir rayonı hákimi – Xalıq deputatları rayonlıq Keńesi baslıǵı J.Adilov alıp bardı.

Sessiya kún tártibine muwapıq:
– Taxtakópir rayonınıń 2025-jıl ushın jergilikli byudjet parametrlerin tastıyıqlaw;


– Máhállelerde isbilermenlikti rawajlandırıw, xalıqtıń bántligin támiyinlew hám kámbaǵallıqtı qısqartıw boyınsha
2024-jıldıń 1-dekabr kúnine shekem kelip túsken múrájatlardı analiz etken halda, hákim járdemshileri iskerliginiń nátiyjeliligi;


– Taxtakópir rayonında sektorlardaǵı jumıslar nátiyjeligin jánede asırıw maqsetinde olarǵa biriktirilgen aymaqlardı bólistiriliwin qayta kórip shıǵıw;

– Taxtakópir rayonında “Hayallar dápteri”niń 5-basqıshına kirgizilgen hayal-qızlardı “Hayallar dápteri”nen shıǵarıw;

– Taxtakópir rayonında 2025-jıl “Kámbaǵallıqtan abadanlıqqa qaray” baǵdarlaması sheńberinde tańlanǵan máhállelerde qıytaq jerlerdi suwǵarıwdı jaqsılaw;

– Taxtakópir rayonı salıq inspekciyası tárepinen 2024-jıl dawamında jergilikli byudjet daramatlarınıń orınlanıw jaǵdayları hám qosımsha rezervlerdi anıqlaw boyınsha alıp barılǵan jumısları;

– Ózbekstan Respublikası Jaslar isleri agentligi Taxtakópir rayonlıq bólimi tárepinen “2024-jıl Jaslar hám biznesti
qollap-quwatlaw” jılı sheńberinde ámelge asırılǵan jumısları haqqındaǵı máseleler kórip shıǵıldı.

Sessiya kún tártibindegi máseleler boyınsha deputatlar ózleriniń pikir hám usınısların bildirdi. Soń kórilgen máseleler boyınsha Xalıq deputatları Taxtakópir rayonlıq Keńesi tárepinen tiyisli sheshimler qabıl etildi.

Taxtakópir rayonı hákimliginiń málimleme xızmeti