Húrmetli Prezidentimizdiń Qaraqalpaqstan Respublikasına saparı dawamında belgilep berilgen wazıypalardıń orınlanıwın támiyinlew maqsetinde Taxtakópir rayonı «Ǵárezsizlik» mákan puqaralar jıyını «Doslıq gúzarı» kóshesi boyınan zamanagóy kórinistegi 24/7 sistemada xızmet kórsetiwshi gastronomiyalıq kóshe qurıp pitkerilip, paydalanıwǵa tapsırıldı.

Usı jıldıń 19-mart kúni jańa obekttiń ashılıw saltanatı ótkerilip, ilajǵa rayon hákimi J.Adilov, Qaraqalpaqstan Respublikası Joqarǵı Keńesiniń komitet baslıǵı M.Atamuratov hám keń jámiyetshilik wákilleri qatnastı.



Ilajda sózge shıǵıp sóylewshiler, pútkil elimiz boylap keńnen belgilenip atırǵan ulıwma xalıqlıq Nawrız bayramı hám rayonımızdıń kórkine-kórk qosıp, jol boyınıń shıraylanıwına úlken úlesin qosıp turǵan kóshe hám xızmet kórsetiw orınlarınıń paydalanıwǵa tapsırıwı menen jıynalǵanlardı qutlıqladı.


Aytıp ótiw orınlı, kósheni zamanagóy koriniske keltiriwde AKB «Agrobank» qáwenderligi esabınan 2 mlrd. sum qarjı ajıratılıp, «Reverstroy» JShJ tárepinen qurılıs jumısları alıp barıldı.

Bul orında jámi 23 sawda hám xızmet kórsetiw orınları, sonnan 10 azıq-awqat ónimlerin satıw ornı, 3 gózzallıq salonı hám shashtárezxana, 2 gósh ónimlerin satıw ornı, 2 awqatlanıw ornı hám 6 basqa jónelisler boyınsha xızmet kórsetiw orınları shólkemlestirildi.

Тaxtakópir rayonı hákimliginiń málimleme xızmeti