Ózbekstan Respublikası Prezidentiniń 2021-jılı 7-may kúni «Avtomobil transportında jolawshılar tasıw jumısın tártipke salıwdı elede ápiwayılastırıw is-ilájları haqqında»ǵı PQ-5108-sanlı qarar qabıl etildi.
Qararǵa muwapıq 2021-jıl 15-maydan 2022-jıldıń aqırına shekem eksperiment tárizinde aydawshıdan tısqarı tórt orınlıqlı jeńil avtotransportta taksi xızmetin kórsetiw jeke tártiptegi isbilermenlik (JTI) jumıs túrleriniń dizimine kirgiziledi. Jeke tártiptegi isbilermen sıpatında jolawshı tasıw jumısı licenziya beti tiykarında ámelge asırıladı.
Licenziya betin alıwı ushın:
– 21 jasqa tolǵan hám basqarıwında arza beriw waqtında 10 jıldan artıq bolmaǵan múddette ekspluataciyalanıp atırǵan jeńil avtomobil bolıwı;
– transport quralın texnikalıq xızmet kórsetiw stanciyalarında hár 6 ayda keminde bir márte texnikalıq tekseriwden ótkeriwi;
– «Uztrans» birden-bir interaktiv málimleme sistemasına jalǵanǵan kóp tarmaqlı poliklinikalar, jeke menshik klinikalarda yamasa shańaraqlıq poliklinikalarda aylıq medicinalıq tekseriwden ótiwi kerek.
Sonday-aq, jeke tártiptegi tasıwshılar:
– jumısı sheńberinde xızmetkerlerdi jumısqa jallay almaydı;
– 2021-jıl 1-sentyabrge shekem bolǵan waqıtta jeke tártiptegi tasıwshılardı mámleketlik dizimnen ótkerilgenligi ushın mámleketlik bajı óndirilmeydi;
– licenziya beti ushın jılına bir márte BEMnıń bir esesi (245 mıń swm) muǵdarında mámleketlik bajı tóleydi;
2021-jıl 1-sentyabrden baslap jeke tártiptegi tasıwshılar jumısın tek ǵana agregatorlar xızmetinen paydalanǵan halda ámelge asıradı.
Jeke tártiptegi tasıwshılar ushın tómendegi talaplar engiziledi:
avtomobil transportınıń tóbesine «TAXI» tanıs belgisi toq sarı reńli fonar ornatıw;
tólemdi ámelge asırıw, sonday-aq basıp ótken joldı elektron tárizde belgilew imkániyatın beriwshi arnawlı qosımshalarǵa iye qurılmalar (atap aytqanda uyalı telefonlar, planshetler) bolıwı;
avtomobil transportınıń priborlar panelinde avtomobil transportınıń mámleketlik nomeri, jeke tártiptegi isbilermen sıpatında dizimnen ótkerilgenligi haqqındaǵı hújjet (yaki usı xızmet túrin ámelge asırıw ushın licenziya/licenziya beti) hám aydawshınıń telefon nomeri kórsetilgen tablichkası bar bolıwı kerek.

T.Jusipov
Taxtakópir rayonı Mámleketlik
xızmetler orayı bas qánigesi