Jergilikli mámleketlik uyımları tárepinen nızamǵa qayshı hújjetler qabıl etiliwiniń aldın alıw, hákimlikler iskerliginiń ashıqlıǵın hám áshkaralıǵın támiyinlew maqsetinde Húkimetimizdiń “Jergilikli mámleketlik hákimiyat uyımları tárepinen qabıl etiletuǵın sheshimlerdi islep shıǵıw, kelisiw hám dizimnen ótkeriwdiń birden-bir elektron sistemasın engiziw ilajları haqqında”ǵı qararı qabıl etildi.
Qararǵa muwapıq, jergilikli mámleketlik hákimiyat uyımları sheshimlerin islep shıǵıw, kelisiw hám dizimnen ótkeriwdiń birden-bir elektron —«E-qarar» sisteması 2021-jıldıń yanvar-may aylarında Qashqadárya wálayatında aprobaciya qılınıp, huqıqıy eksperiment ótkerildi. 2021-jıl 1-iyuldan baslap «E-qarar» elektron sisteması respublikanıń barlıq jergilikli mámleketlik hákimiyatı uyımlarında engiziliwi belgilengen.
Qarardıń Qaraqalpaqstan Respublikasında orınlanıwın támiyinlew maqsetinde birinshi bolıp, 2021-jıl 17-iyun kúni Ellikqala rayonı hákiminiń elektron sheshimi qabıllandı. Búgingi kunge shekem Qaraqalpaqstan Respublikası Ministrler Keńesi hám rayon(qala) hákimleriniń 1000 nan aslam elektron sheshimleri usı sistema arqalı qabıllandı.
Jańa onlayn programmanıń ústinlik tárepleri, shıǵarılıp atırǵan sheshimlerdi tuwrıdan-tuwrı «E-qarar» sisteması arqalı keń jámiyetshilik biymálel baqlap barıwı múmkin.
«E-qarar» sistemasın engiziwdiń tiykarǵı maqseti bul:
-jergilikli mámleketlik hákimiyatı uyımlarınıń sheshimlerin qabıllaw processinde múddetlerdi kısqartıw;
-jergilikli mámleketlik hákimiyatı uyımları sheshimlerin islep shıǵıwda insan faktorınıń aralasıwın kemeytiriw;
-xalıqtı jergilikli mámleketlik hákimiyatı uyımları tárepinen qabıl etilgen barlıq sheshimler menen tanısıw múmkinshiligin jaratıw
(e-qaror.gov.uz);
«E-qarar» sistemasınıń abzallıqları :
-Hákim sheshimi hám Xalıq deputatları rayonlıq, qalalıq Qeńesi sheshimlerin joybarların tayarlaw, mápdar organlar menen joybarlarga elektron kóriniste viza qoyıw, kelisiw, huqıqıy ekspertizaga jiberiw;
– Hákim hám Xalıq deputatları rayonlıq, qalalıq Qeńesi sheshimlerin qabıllaw, dizimnen ótkeriw, olarǵa qaytalanbaytugın arnawlı nomer beriw hám avtomatikalıq túrde rásmiy járiyalaw processin basqarıw;
Hákim hám Xalıq deputatları rayonlıq, qalalıq Qeńesi qabıl etilgen hújjetler menen 24/7 (saat) rejiminde hám Internet tarmaǵı isleytuǵın dúnyanıń qálegen tochkasınan paydalanıw hám tanısıw múmkinshiligi.
«E-qarar» elektron sistemasın respublikamızdıń barlıq jergilikli mámleket hákimiyatı uyımlarında engiziliwi olardıń iskerliginiń ashıqlıǵına, puqaralardıń konstituciyalıq huqıq hám erkinlikleri buzılıwınıń aldın alıwǵa, sonıń menen birge isbilermenlik subektleri ushın tiykarsız qárejetlerdi keltirip shıǵarıwshı normalardıń engiziliuin aldın alıwǵa xızmet etedi.

 Paraxat Kojametov
Qaraqalpaqstan Respublikası Ádillik ministrligi
                                                                                         Huqıqıy ekspertiza hám yuridikalıq xızmetlerdiń iskerligin muwapıqlastırıw bólimi baslıǵı