Sońǵı jılları mámleketimizde ashıqlıq siyasatı, insanpárwarlıqqa tiykarlanǵan reformalar saylawlarǵa tayarlıq kóriw hám olardı ótkeriw processinde de kózge taslanbaqta. Xalqımızdıń erteńgi kúnge isenimin, watanımızdıń jarqın keleshegi ushın jan kúydiriwin saylaw barısındaǵı olardıń belsendiliginen kóriwimizge boladı.
Solay etip, elimizde kútilip otırǵan saylawǵa tayarlıq jumısları da baslanıp ketti. Biziń Taxtakópir rayonında saylaw aldı tayarlıq jumısları qalay alıp barılmaqta? Mine, usı sorawlarǵa juwap alıw maqsetinde rayon hákimliginiń málimleme xızmeti tárepinen baspasóz konferenciyası bolıp ótti. Onda jurnalistler menen birge saylaw uchastkası aǵzalıǵına talabanlar qatnastı.

Baspasóz konferenciyasın rayon hákimi Jambul Adilov ashtı hám saylaw uchastkalarınıń búgingi kúndegi jumıslarına toqtap ótti.

Rayon hákiminiń jámiyetshilik penen islesiw boyınsha másláhátshisi, shtab baslıǵı Murat Shabanov uchastkalarda alıp barılıp atırǵan tayarlıq jumısları boyınsha málimleme jasadı.

Bunnan soń bıyılǵı jıldaǵı Ózbekstan Respublikası Prezidentin saylaw processindegi ózgerisler, tayarlıq jumısları boyınsha jurnalistlerdi qızıqtırǵan sorawlarǵa juwaplar berildi.

Taxtakópir rayonı hákimligi málimleme xızmeti