Puqaralardıń saylaw huqıqları nızam menen kepillengen hámde sud tárepinen hákimshilik-huqıqıy tártipte qorǵaladı.
Eger puqara saylawshılar diziminde qáte-kemshiliklerdi anıqlasa, tiyisli saylaw komissiyasına shaǵım etiwi múmkin. Sonıń menen birge, puqara bul haqqında hákimshilik sudqa da múrájaat etiwi múmkin.
Saylaw komissiyaları saylaw kampaniyasın ótkeriw dáwirinde fizikalıq hám yuridikalıq shaxslardıń nızam talapları buzılǵanlıǵı yaki saylawdı shólkemlestiriwdiń basqa máseleleri boyınsha ózine kelip túsken múrájatların óz wákillikleri sheńberinde kórip shıǵıwı, usı múrájatlar boyınsha tekseriwler ótkeriwi hám úsh kúnlik múddette olarǵa jazba juwaplar beriwi, saylawǵa keminde altı kún qalǵanda yaki dawıs beriw kúni kelip túsken múrájatlardı bolsa dárhal kórip shıǵıp, juwap qaytarıwı shárt.
Kelip túsken múrájatlar dizimge alıw dápterinde dizimge alınadı.
Saylaw komissiyasınıń baslıǵı múrájattı kórip shıǵıw hám ol boyınsha qarar qabıl etiw ushın tiyisli komissiyanı belgilengen múddetlerde shaqıradı hám onıń májilisin ótkeredi. Májiliske mápdar shaxslar mirát etiliwi múmkin.
Qoyılǵan máselelerdi sheshiw óz wákilligine kirmeytuǵın uchastkalıq saylaw komissiyasına kelip túsken múrájat úsh kúnlik múddette tiyisli uyımlarǵa múrájat jibergen shaxs bul haqqında xabardar etilgen halda jiberiledi.
Múrájattı kórip shıqqan saylaw komissiyaları aǵzaları onı kórip shıǵıw nátiyjeleri hám qabıl etilgen qarar haqqında múrájat jibergen shaxsqa xabar beriwi shárt.
Puqaralar saylaw nızamshılıǵı buzılıwı júzesinen tuwrıdan-tuwrı hákimshilik sudqa múrájat etiwi múmkin.
Bunda saylaw komissiyalarınıń háreketleri (qararları) ústinen berilgen shaǵım sud tárepinen shaǵım berilgen kúnnen baslap úsh kúnnen keshiktirmey, eger saylawǵa altı kúnnen kem waqıt qalǵan bolsa, dárhal kórip shıǵıladı.
Múrájaat boyınsha ótkerilgen sud májilisinde arza beriwshi hám tiyisli komissiya wákili, sonday-aq prokuror qatnasında kórip shıǵıladı. Joqarıda atap ótilgen shaxslardıń sud májilisine kelmesligi sudta isti kórip shıǵıwǵa tosqınlıq etpeydı.
Itibar beriw lazım tárepi, sudtıń hal qılıw qararı qabıl etiliwi menen dárhal tiyisli saylaw komissiyasına hám arza beriwshige tapsırıladı hám dárhal orınlanıwı shárt.
Juwmaqlap aytqanda, puqaralardıń huqıqıy sanası hám dúnya qarasınıń joqarılıǵı, olardıń ózleriniń saylaw menen baylanıslı huqıqlarınıń puxta biliwi jámiyetimizde huqıqıy mádeniyattı asırıw menen birge saylawlardıń ádil hám nızamlı ótiwine xızmet etedi.

B.Dosımbetov
Nókis rayonlar aralıq
hákimshilik sudı baslıǵı