Xalıqtı dizimge alıw ilajı hár 10 jılda bir márte ótkeriledi. Búgingi kúnde BMSh dúnya mámleketlerin hár 10 jılda keminde bir mártebe óz xalqın dizimge alıwdı úrdis etken. Sonlıqtan da kópshilik mámleketlerde xalıqtı dizimge alıw ilajı hár 10 jılda bir mártebe ótkeriledi. Al, nege áynen 10 jılda bir mártebe, degen sawal tuwılıwı tábiyiy hal. Bunıń bir qansha sebepleri bar, álbette. 10 jıl ishinde jámiyette salmaqlı ózgerisler júz beredi. Áwelgi dizimge alıw usılları nátiyjeliligi sezilerli dárejede kemeyiwi sebepli, sorawnamalar mazmunına dúzetiwler, maǵlıwmatlardı toplaw hám qayta islew usıllarına zamanagóy talaplardan kelip shıqqan halda ózgerisler kirgiziw talap etiledi.
2015-jılda BMShnıń “2020-jılda xalıq hám úy-jay fondın dizimge alıw barısındaǵı principlar hám usınıslar” rezolyuciyası qabıl etilip, 2020-jıl raundına start berilgen edi. Bul raund 2015-jıldan 2025-jılǵa deyingi dáwirdi óz ishine aladı. Ózbekstan da óz xalqın dizimge alıw ilajın ótkeriwdi rejelesirgen mámleketler qatarınan orın aldı hám dúnya xalıqları boyınsha 228- bolıp BMSh tárepinen dizimge alındı. Biraq koronavirus pandemiyasınıń dúnyanı boylap keń tarqalıwı kóplep jaǵdaylar sıyaqlı xalıqtı dizimge alıwdı shólkemlestiriw hám ótkeriw processine de óziniń keri tásirin kórsetti.
Ayırım mámleketlerde bul ilajdıń múddeti ózgerttirildi.
Elimizde 2022-jılda ótkeriliwi rejelestirilgen xalıqtı dizimge alıw ilajı 2023-jıldıń 1-25-noyabr kúnlerine kóshirildi. Bul Ministrler Kabinetiniń 2020-jıl 11-noyabrdegi “Ózbekstan Respublikasında 2023-jılda xalıqtı dizimge alıwǵa tayarlıq kóriw hám onı ótkeriw is-ilajları haqqında”ǵı qararı menen belgilendi. Sonday-aq, usı qarar menen 2021-jıldıń 1-25-noyabr kúnleri Ándijan wálayatınıń Xojaabat rayonı, Tashkent wálayatınıń Joqarı Shırshıq rayonı, Xorezm wálayatınıń Xiywa qalası hám de Tashkent qalasınıń Yashnabat rayonında xalıqtı sınaw tiykarında dizimge alıw ilajın ótkeriw belgilendi.

Taxtakópir rayonlıq statistika bólimi