Húrmetli shıpakerler hám barlıq medicina xızmetkerleri!

Mámleketimizde noyabr ayınıń ekinshi ekshembisi Ózbekstan Respublikası medicina xızmetkerleri kúni sıpatında belgilenedi. Búgingi ekshembi – sizlerdiń kásiplik bayramıńız.
Medicina tarawı barǵan sayın rawajlanıp, Prezidentimizdiń jankúyerligi menen jańa medicinalıq ásbap-úskeneler arqalı materiallıq-texnikalıq bazası tolıqtırılıp barılmaqta. Insan ushın áhmiyetli bolǵan quramalı operaciyalar, aǵza kóshiriw trasplantaciyalardı shet ellerden izlemey, ózimizdiń elimizde ámelge asırıw islerine jol berildi, maman kadrlar tayarlaw hám qayta tayarlaw baǵdarına ayrıqsha kewil bólindi. Elimizdiń túpkir-túpkirine deyin medicina orınlarına jónlew jumısları alıp barılıp, alısta jaylasqan awıllarǵa barıp jumıs alıp baratuǵın jas shıpakerler hár tárepleme qollap-quwatlanbaqta. Sonıń ápiwayı mısalı biziń rayonımızdıń eń alıs aymaǵı esaplanǵan “Qostruba” elatınıń medicina ortalıǵına da jas qánige shıpaker jumısqa jiberildi. Bul biziń xalqımızdıń salamatlıǵına mámleketimiz tárepinen kórsetilip atırǵan ǵamxorlıqlardan biri sanaladı.
Kúni keshe Prezidentimiz gúllán medicina xızmetkerlerine óziniń jollaǵan qutlıqlawında tómendegilerdi atap ótti:
“Xalqımızdıń salamatlıǵın saqlaw hám bekkemlew biz ushın bunnan bılay da baslı wazıypa bolıp qaladı. Keleside tarawǵa ajıratılatuǵın qárejetlerdi 2 esege asırıw, sonıń ishinde, jaqın bes jılda joqarı kategoriyalı shıpakerlerdiń aylıǵın ekvivalent esabında 1 mıń dollarǵa jetkeriw belgilengeni bul joldaǵı rejelerimizdiń kóleminiń dáliyli,-dep atap ótti Prezident.

Tiykarǵı wazıypamız – medicina tarawın joqarı nátiyje menen isleytuǵın, haqıyqıy xalıqshıl sistemaǵa aylandırıwdan ibarat.”

Húrmetli medicina xızmetkerler! Sizlerdiń turmısımızda tutqan ornıńız ayrıqsha. Ásirese ótken jıldan beri xalqımız basınan keshirip atırǵan koronavirus infekciyası dáwirindegi sizlerdiń miynetińizdi joqarı bahalaymız. Sizler hár qanday alǵıslarǵa ılayıq, xalqımızdıń salamatlıǵı jolında pidayı xızmet atqarıp atırǵan taraw xızmetkerlerinen esaplanasız.
Búgingi kásiplik bayramıńız menen bársheńizdi rayon hákimligi atınan qutlıqlayman hám mashaqatlı jumıslarıńızda tabıslar, shańaraqlarıńızǵa amanlıq, ózlerińizge salamatlıq tileymen.