Ózbekstan Respublikası Ministrler Kabinetiniń 2023-jıl 14-avgust kúngi «Joqarǵı oqıw orınlarınıń studentlerin turaq-jay menen támiyinlew sistemasın jetilistiriw is-ilájları haqqında»ǵı 376-sanlı qararı qabıl etildi.

Qarar menen mámleketlik joqarǵı oqıw orınları studentlerin studentler turaq jayına jaylastırıw boyınsha mámleketlik xızmetlerdi kórsetiwdiń hákimshilik reglamenti tastıyıqlandı.

Usı reglamentke muwapıq mámleketlik joqarǵı oqıw orınlarınıń studentleri turaq jayına ornalasıw mámleketlik xızmetler orayları hám Birden-bir interaktiv mámleketlik xızmetler portalı (my.gov.uz) arqalı elektron tárizde,  biypul ámelge asırıladı.

Studentlerdi turaq jayına jaylastırıw ushın arza beriw hár jılı 1-avgusttan baslanadı hám oqıw jılı aqırına shekem dawam etedi.

2023/2024 oqıw jılında 1-kurs studentleri ushın  studentler turaq jayına jaylastırıw joqarıdaǵı qarar menen tastıyıqlanǵan reglament tiykarında ámelge asırıladı.

2-kurs hám onnan joqarı kurs studentlerin studentler turaq jayına jaylastırıw aldınǵı tártipte ámelge asırıladı. Bunda studentler turaq jayına ornalasıw ushın arza joqarǵı oqıw ornı studentler turaq jayına ornalastırıw komissiyasına 2023-jıl 25-avgustqa shekem tapsırıladı.

2024/2025 oqıw jılınan baslap barlıq kurs studentleri ushın mámleketlik joqarǵı oqıw ornı studentler turaq jayına ornalastırıw onlayn tárizde ámelge asırıladı.

Tómendegi qatlamdaǵı studentler ústemlik tiykarında studentler turaq jayına qabıl etiledi:

-«Mehribanlıq úyleri» tárbiyalanıwshıları,  jetim hám ata-ana qaramaǵınan ayırılǵan studentler;

-«Sociallıq qorǵaw birden-bir reestri»,  «Temir dápter» hám «Hayallar dápteri»ne kiritilgen sociallıq qorǵawǵa mútáj shańaraqlardıń perzentleri hám de «Jaslar dápteri»nde turatuǵın studentler;

-I hám II topar mayıplıǵı bolǵan studentler;

-bir shańaraqtan bakalavr basqıshı kúndizgi bilimlendiriw formasında eki hám onnan artıq tólemli-shártnama tiykarında oqıp atırǵan shańaraqlar perzentleri;

-xalıqaralıq pán olimpiadaları,  Ózbekstan Respublikası Joqarǵı bilimlendiriw,  pán innovaciyalar ministrligi tárepinen ótkeriletuǵın respublika pán olimpiadalarında jeńiske erisken studentler;

-«Jıl studenti» hám «Studentler teart studiyaları» kórik-tańlawınıń respublika basqıshı jeńimpazı bolǵan studentler;

-joqarǵı oqıw orınları studentleri arasında ótkerilgen «Zakovat» intellektual oyınınıń respublika basqıshında jeńimpaz bolǵan studentler;

-studentler turaq jayında studentler Keńesi baslıǵı,  qabat sárdarı bolǵan studentler.

Taxtakópir rayonı Ádillik bólimi Mámleketlik xızmetler orayı direktorı.

P.Reymkulov

Taxtakópir rayonı hákimliginiń málimleme xızmeti