Sud islerinde qatnasıwshı shaxslar, sonday-aq iste qatnasıwǵa shaqırılmaǵan, biraq huqıqları hám minnetlemeleri haqqında sud sheshiwshi qarar qabıl qılǵan shaxslar birinshi instanciya sudınıń nızamlı kúshine kirmegen sheshiwshi qararı ústinen apellyaciyalıq shaǵım beriwi, prokuror apellyaciyalıq protest keltiriwge haqılı.

Ózbekstan Respublikası Prezidenti janındaǵı isbilermenlik subektleriniń huqıqların hám nızamlı máplerin qorǵaw boyınsha wákil birinshi instanciya sudınıń nızamlı kúshke kirmegen sheshiwshi qararı ústinen apellyaciyalıq shaǵım beriwge haqılı, bunnan isbilermenlik iskerligi menen baylanıslı bolmaǵan dawalar kirmeydi.

Apellyaciyalıq shaǵım (protest) apellyaciya instanciyası sudına jollanadı, biraq sheshiwshi qarar qabıl etken sudqa beriledi.

Sheshiwshi qarardı qabıl etken sud shaǵım (protest) kelip túsken kúnnen baslap bes kúnlik múddette onı apellyaciya instanciyası sudına is penen birge jiberiwi shárt.

Eger nızamda basqa múddet belgilenbegen bolsa, apellyaciyalıq shaǵım (protest) sheshiwshi qarar qabıl etilgen kúnnen baslap bir ay ishinde beriliwi múmkin.

Apellyaciyalıq shaǵımdı (protestti) beriwdiń ótkerip jiberilgen múddeti shaǵım (protest) berip atırǵan shaxstıń iltimasnaması boyınsha apellyaciya instanciyası sudı tárepinen, apellyaciyalıq shaǵımdı (protestti) beriw múddeti ótkerip jiberilgenniń sebepleri sud tárepinen úzrli dep tabılǵan bolsa, tikleniwi múmkin.

Apellyaciyalıq shaǵımdı (protestti) beriwdiń ótkerip jiberilgen múddetin tiklew haqqında apellyaciyalıq shaǵımdı (protestti) is júritiwge qabıl qılıw haqqındaǵı uyǵarıwında kórsetedi.

Apellyaciyalıq shaǵımdı (protestti) is júritiwge qabıl qılıw, qabıl qılıwdan bas tartıw yaki qaytarıw máselesi shaǵım (protest) is penen birge sudqa kelip túsken kúnnen baslap bes kúnnen keshiktirmey apellyaciya instanciyası sudı sudyası tárepinen jeke tártipte sheshiledi.

Apellyaciyalıq shaǵımdı (protestti) is júritiwge qabıl etiw, qabıl etiwden bas tartıw yaki qaytarıw haqqında uyǵarıw shıǵarıladı, iste qatnasıwshı shaxslar bul haqqında úsh kúnlik múddette xabardar etiledi.

Belgilengen forma hám mazmun talaplarına boysınǵan halda berilgen apellyaciyalıq shaǵım (protest) apellyaciya instanciyası sudınıń is júritiwine qabıl qılınadı.

Apellyaciyalıq shaǵımdı (protestti) is júritiwge qabıl qılıw haqqındaǵı uyǵarıwda apellyaciyalıq shaǵımdı (protestti) kóriw boyınsha sud májilisi ótkeriw waqtı hám ornı kórsetiledi.

Sud isti apellyaciya instanciyasında kóriw waqtında birinshi instanciya sudınıń sheshiwshi qararınıń nızamlılıǵın hám tiykarlılıǵın tekseredi. Sud jańa dáliyllerdi tekseriwi hám jańa faktlerdi anıqlawı múmkin.

Apellyaciya instanciyası sudı birinshi instanciya sudınıń sheshiwshi qararın tolıq kólemde tekseriwi shárt.

Birinshi instanciya sudında kórip shıǵıw predmeti bolmaǵan jańa talaplar apellyaciya instanciyası sudı tárepinen qabıl qılınbaydı hám kórilmeydi.

Apellyaciya instanciya sudı apellyaciyalıq shaǵımdı (protestti) kóriw nátiyjeleri boyınsha qarar qabıl qıladı, qarar isti kórgen sudyalar tárepinen imzalanadı.

Apellyaciya instanciyası sudı birinshi instanciya sudınıń uyǵarıwı, qararı ústinen berilgen shaǵımdı (protestti) kórip shıǵıw nátiyjeleri boyınsha, uyǵarıwdı, qarardı ózgerissiz qaldırıwǵa, uyǵarıwdı, qarardı ózgertiwge yaki biykar qılıwǵa, arzanı qabıl qılıwdan bas tartıw haqqındaǵı, arzanı qaytarıw, is júritiwdi toqtatıp turıw haqqındaǵı uyǵarıwdı biykar qılıwǵa hám arzanı birinshi instanciya sudına kórip shıǵıw ushın jiberiwge, uyǵarıwdı biykar etiwge hám arzanı (shaǵımdı), isti kórip shıǵıw ushın sudqa tiyisliligi boyınsha basqa sudqa jiberiwge haqılı.

G.Baynazarova
Nókis rayonlar aralıq Hákimshilik sudı sudyası

Taxtakópir rayonı hákimliginiń málimleme xızmeti