Jańa Ózbekstan – Jasıl mákanda birge jasayıq!

Assalawma áleykum, húrmetli rayon turǵınları!

Búgingi kúnde pútkil jer júzinde baqlanıp atırǵan hawa-rayındaǵı unamsız ózgerisler insaniyat aldında turǵan úlken mashqala bolıp, ekologiyalıq ózgerisler insan ómirine qáwip-qáter tuwdırıp atırǵanlıǵı hesh kimge sır emes. Álbette, bul ekologiyalıq qáwip-qáterlerge tásir etiwshi faktorlar bular, klimattıń ózgeriwi, global ısıwshılıq hám Aral teńiziniń qurıwı, qurǵaqshılıq hám taǵı basqalar ekologiyalıq apatshılıqtı keltirip shıǵarıp, bul óz gezeginde insan organizmine zıyanlı tásirin tiygizbekte. Bul boyınsha mámleketimizde sistemalı reje tiykarında qorshaǵan ortalıqtı asıraw, tábiyiy resurslardan aqılǵa uǵras paydalanıw hám ekologiyalıq jaǵdaydı jaqsılawǵa qaratılǵan dawamlı jumıslar alıp barılmaqta.

Haqıyqatında da ekologiyalıq daǵdarıstıń aldın alıw ushın kóklemzarlastırıw jumısların úzliksiz alıp barıw kerek ekenligin búgingi turmısımızdıń ózi kórsetip bermekte.

Házirgi waqıtta, ayırım máhállelerde, kóshe hám gúzarlarda bos turǵan, terek egilmegen jerlerdi baǵ-baqshaǵa aylandırıwda máhálle turǵınları menen birgelikte, aymaqtıń abatlıǵı hám xalıqtıń abadanlıǵına xızmet etetuǵın joybarlardı ámelge asırıw tiykarǵı maqset hám wazıypamız bolıwı shárt. Bunıń ushın hár bir máhállede «máhálle baǵları»n jaratıwımız, kóshe boylarında jasıl aymaqlardı kóbeytiwimiz, órnek sıpatında dáslep óz úy aldı qıytaq jerdi hám kóshemizdi abat etiwimiz, «Jasıl mákan» ulıwma milliy joybarına óz úlesimizdi qosıwımız zárúr.

Húrmetli nuranıylar!

Rayonımızdaǵı nuranıylardan máhállelerde «Jasıl mákan» ulıwma milliy joybarın ámelge asırıwda, nállerdi úlgili egiwdi shólkemlestiriwde óz tájiriybelerin xalıq penen birge bólisken halda belsendilik kórsetseńiz, sizlerdiń tájiriybeńiz hám aqıl-násiyat sózlerińiz xalıq ushın júdá áhmiyetli.

Áziz jaslar!

Keleshegimiz qurıwshıları, «Jasıl mákan» ulıwma milliy joybarın ámelge asırıwda sizlerdiń ornıńızda úlken áhmiyetke iye. Sebebi búgingi kún jasları ilimli-bilimli, óz ústinde izlenip jańa keleshekke úlken jetiskenlikler menen kirip kelmekte. Jaslarımız óz aldındaǵı úlken maqsetleriniń qatarına ózi jasap atırǵan kóshe boylarına terek nállerin egiwdi maqset etip alıp hár bir jas bir terek nálinen ekse úlken hám kishige órnek bolıp, elimizdi jasıl mákanǵa aylandırıwda salmaqlı úlesińizdi qosqan bolar edińiz.

Húrmetli fermerler hám diyqanlar!

Jerdiń hár bir qarıs jerinen únemli paydalanıwda fermer hám diyqanlardıń ornı oǵa da úlken. Sol sebepli «Jasıl mákan» ulıwma milliy joybarına óz úlesińizdi qosqan halda baǵ jaratıw hám dala shetlerine terek nállerin ekse hár qıylı ekologiyalıq faktorlardıń aldın alǵan bolar edi.

Qádirli Watanlaslar!

Elimizdi jasıl mákanǵa aylandırıw, tábiyatımızdı, asıraw bárshemizdiń birinshi náwbettegi wazıypamız bolıwı lazım. Ana tábiyatımız tek ǵana ata-babalardan miyras bolıp qalmastan, keleshek áwladqa jetkeriw minnetimiz sanaladı. Sonıń ushın hár birińizdi tábiyattı hám qorshaǵan ortalıqtı asırawǵa óz úlesińizdi qosıwǵa shaqırıp qalaman.

Taxtakópir rayonı hákimliginiń málimleme xızmeti