Mámleketimizde insan, onıń huqıq hám erkinlikleri eń joqarı qádiriyat dárejesine kóterildi. Májbúriy miynettiń barlıq túrlerine shek qoyıw boyınsha bir qatar nızam ham nızam astı hújjetleri qabıl etildi.

Májbúriy miynet – qanday da bir jazanı qollanıw arqalı jumıs islewge májbúrlew bolıp esaplanadı. Hesh kim shaxstı jumıstan bosatıp jiberiw, is haqısın kemeytiw, lawazımınan páseytiw hám basqa usıllar menen májbúriy miynetke tartıwǵa haqılı emes.

Ózbekstan Respublikası Konstituciyasınıń 44-statyasında, sudtıń sheshimi menen tayınlanǵan jazanı ótew tártibinen yamasa nızamda názerde tutılǵan basqa jaǵdaylardan tısqarı májbúriy miynet qadaǵan etiledi.

Balalar miynetiniń balanıń densawlıǵına, qáwipsizligine,
minez-qulqına, aqılıy hám fizikalıq rawajlanıwına qáwip salıwshı, sonıń menen birge onıń bilim alıwına tosqınlıq etiwshi hár qanday túrleri qadaǵan etiledi dep belgilengen.

Ayırım jaǵdaylarda sudtıń sheshimi menen tayınlanǵan jazanı ótew tártibinde shaxstı májbúriy miynetke tartıw múmkin.

Ózbekstan Respublikası Jınayat kodeksiniń 45/1-statyasında májbúriy jámiyetlik jumıslar jazası názerde tutılǵan.

Májbúriy jámiyetlik jumısları húkim etilgen shaxstı haqı tólenbeytuǵın paydalı jámiyetlik jumıslardı orınlawǵa májbúriy tárizde tartıwdan ibarat. Húkim etilgen shaxs jumıs islep yaki oqıp atırǵan bolsa, májbúriy jámiyetlik jumısları jumıstan yaki oqıwdan bos waqıtta óteledi.

Májbúriy jámiyetlik jumısları pensiya jasına jetken shaxslarǵa, on altı jasqa tolmaǵan shaxslarǵa, hámiledar hayallarǵa, úsh jasqa tolmaǵan balaları bar hayallarǵa, birinshi hám ekinshi topar mayıplıǵı bolǵan shaxslarǵa, áskeriy xızmetkerlerge, shet el puqaraları hám Ózbekstan Respublikasında turaqlı jasamaytuǵın shaxslarǵa qarata qollanılmaydı.

Májbúriy miynetke tartıwdıń nızamda názerde tutılǵan basqa jaǵdayları degenimizde puqaralardıń áskeriy minnetti orınlaw yamasa áskeriy yaki ayrıqsha jaǵday járiyalanıwı múnásibeti menen orınlanıwı májbúriy bolǵan jumıslarǵa tartıw túsiniledi.

Jınayat isleri boyınsha Taxtakópir rayonı sudı baslıǵı
D.Srajatdinov

Taxtakópir rayonı hákimliginiń málimleme xızmeti