Búgin Taxtakópir rayonı hákimliginiń Shańaraq hám hayal-qızlar bólimi baslaması menen máhállelerdegi hayal-qızlar belsendileri hám jumıssız hayal-qızlar qatnasıwında «Aydın jol» mákan puqaralar jıyını aymaǵında jasawshı Altıngúl Jumaniyazova hám usı máhálleniń hayal-qızlar belsendisi Almagúl Daljanovanıń shańaraqlarında úy-aldı qıytaq jerlerinen únemli paydalanıw hám toqsanbastı eginlerin egiw boyınsha kórgizbeli seminar shólkemlestirildi.

Seminardı rayon hákiminiń orınbasarı, Shańaraq hám hayal-qızlar bólimi baslıǵı G.Seytnazarova alıp barıp, hayal-qızlarımızǵa ózin-ózi bánt etiw, úy-aldı qıytaq jerlerinen únemli paydalanıp, shańaraǵın miywe-palız ónimleri menen támiyinlew hám qosımsha dáramat tabıwdı úgit-násiyatladı.
Sonday-aq, Altıngúl Jumaniyazova ómirlik joldası M.Dawletiyarov penen birgelikte miywe tereklerin tárbiyalaw, júzimnen nál tayarlaw hám olardı egiw usıların seminar qatnasıwshılarına tájriybede kórsetip ótti.

Bunnan soń, «Aydın jol» mákan puqaralar jıyını hayal-qızlar belsendisi Almagúl Daljanovanıń úy-aldı qıytaq jerinde pıyaz hám chesnok egiw, gúl egiw hám olardı kóbeytiw usıları menen tanıstırıp, eginlerdi azıqlandırıwda biogumustı tógin retinde paydalanıwdıń nátiyjeliligi boyınsha keń túrde túsinik jumısları alıp barıldı.



Seminarda qatnasıwshı hayal-qızlar, ózlerin qızıqtırıp júrgen sorawlarına juwaplar alıp, aldaǵı waqıtta ózleriniń úy-aldı qıytaq jerlerinde usı tájiriybelerden kelip shıǵıp egin egiwdi maqset etti.

Taxtakópir rayonı hákimliginiń málimleme xızmeti