Mámleketlik medicinalıq qamsızlandırıw mexanizmlerin elimizde engiziw maqsetinde Ózbekstan Respublikası Prezidenti tárepinen 2024-jıl 5-sentyabr kúni «Mámleketlik medicinalıq qamsızlandırıw mexanizmlerin engiziw boyınsha ilajlar haqqında»ǵı qararı qabıl etilgen edi.

Usı qarardıń mazmun-mánisin keń jámiyetshilikke túsindiriw maqsetinde, rayonlıq Medicina birlespesinde, rayon hákiminiń orınbasarı Sh.Bekturǵanov, rayonlıq Medicina birlespesi bas shıpakeri Í.Palwanov, mahálle baslıqları hám taraw xızmetkerleri qatnasıwında ushırasıw ótkerildi.

Qararǵa muwapıq:
Mámleketlik medicinalıq qamsızlandırıw sheńberinde biypul medicinalıq járdemler hám dári-dármaqlar mámleket byudjetine tólenetuǵın salıqlar esabınan ámelge asırıladı, xalıqtan qamsızlandırıw ushın qosımsha tólem óndirilmeydi.
Sonday-aq, mámleket byudjet qarjıları esabınan qaplanatuǵın medicinalıq járdemniń kepillengen kólemi (kepillengen paket) tastıyıqlanıp, usı paketke kirgizilgen medicinalıq xızmetler hám dári-dármaqlar Mámleketlik medicinalıq qamsızlandırıw qorı qarjısı esabınan ámelge asırıladı.
Kepillengen paketke kirgizilgen medicinalıq xızmetlerden biypul paydalanıw ushın:
– belgilengen múddetlerde tiyisli medicinalıq kóriklerden ótiw,
– shańaraq shıpakeri yamasa medicina brigadasına múrájat etiw talap etiledi.
Shańaraq shıpakeri tiyisli tártipte kórikten ótkergennen soń, zárúr bolsa emlewxanaǵa elektron jollama beredi, usı jollama tiykarında tar qánigeli shıpakerler kóriginen ótkeredi hám emlewxanaǵa jatqarıladı.
Usı tártip saqlanbaǵan jaǵdaylarda medicinalıq xızmet pullı kórsetiledi. Sonıń menen birge, birlemshi medicina-sanitariyalıq járdem kórsetiwshi mekemeleri hám oǵan biriktirilgen Ózbekstan Respublikası puqaraları, Ózbekstan Respublikasınıń salıq rezidenti dep tabılǵan shet el puqaraları, puqaralıǵı bolmaǵan shaxslar arasında kelisim shártnama dúziledi.
Bunda:
-Puqaralarǵa – salamat turmıs tárizine ámel etiw, zıyanlı ádetlerden waz keshiw, óziniń medicinalıq bilimin asırıw, shıpaker kórsetpelerine ámel etiw, profilaktika hám skrining kóriklerden waqtında ótiw;
– Shańaraq shıpakerine – puqaralardı belgilengen táripte qabıl etiw hám másláhátler beriw (jollama), medicinalıq xızmetlerdi óz waqtında, sapalı hám tolıq kólemde kórsetiw, dári-dármaqlardı tuwrı buyırıw sıyaqlı juwapkerli wazıypalar júkletiledi.
Shıpaker tárepinen tayınlanǵan elektron recept tiykarında dáriler kepillengen paket sheńberinde nawqaslarǵa dárixanalar tárepinen biypul beriledi hám olardıń qárejetleri qamsızlandırıw qorı esabınan qaplap beriledi (reimbursaciya).
Xalıqqa kórsetiletuǵın kepillengen paketke kirgizilgen medicinalıq xızmetler Fond tárepinen satıp alınadı, yaǵnıy medicinalıq mekeme hám Fond arasında dúzilgen shártnama tiykarında qarjılandırılıp barıladı.
Ambulator medicinalıq xızmet kórsetiwshi birlemshi medicina-sanitariya mekemeleri xalıq jan basına kóre shártnamada kórsetilgen jumıs kólemine muwapıq, Emlewxanalardı qarjılandırıw olarǵa ajıratılǵan qarjınıń 15 payızınan kem bolmaǵan bólegi hár bir emlengen jaǵdaydan kelip shıǵıp tólep beriledi.
Jeńillikke iye bolǵan shaxslar shıpaker kórsetpesi tiykarında elektron xabar sistemasın arqalı qáliplestiriletuǵın jollama tiykarında Mámleket byudjeti qarjısı esabınan biypul emlenedi.
2025-jıl 1-iyuldan baslap rayon (qala) hám aymaqlıq medicina mekemelerinde rejeli stacionar medicinalıq xızmetti elektron náwbet tiykarında biypul alıw huqıqına iye boladı:
– fizikalıq shaxslardan alınatuǵın dáramat salıǵı hám sociallıq salıq tólewshiler; – salıq kodeksine muwapıq miynet stajın esaplaw ushın belgilengen muǵdarda salıq tólegen shaxslar;
– jas óspirimler, oqıw ornı oqıwshı-studentler, hámiledar hayallar hám eki jasqa tolmaǵan balasına kútim qılıp atırǵanlar, miynet organlarında jumıssız sıpatında dizimnen ótkenler, mámleketlik pensiya alıwshılar hám de “Ijtimoiy ximoya yagona reestri”nde kem támiyinlengen dep belgilengenlar shańaraq aǵzaları.
2027-jıl 1-yanvardan baslap sońǵı bir jıl dawamında keminde 6 ay fizikalıq puqaralardan alınatıǵın dáramat salıǵı yaki sociallıq salıq tólegenlerge mámleketlik medicinalıq qamsızlandırıw sistemasında joqarı texnologiyalı medicinalıq járdem biypul ámelge asırıladı.
2024-jıl aqırına shekem nawqaslardıń barlıq medicinalıq maǵlıwmatları tiykarında qáliplestirilgen hám medicina mekemeleriniń ózara úziliksiz birge islesiwin támiyinleytuǵın «Elektron poliklinika» hám «Elektron emlewxana» informaciyalıq sistemalar ámeliyatqa engiziledi.
Sonday aq, medicina mekeme baslıqlarına mekemeniń quwatına qarap bólimler profilin (qánigeligin), olardıń emlew orınları sanın ózgertiriw hám de ajıratılǵan qarjılar sheńberinde xızmetkerler sanın jumıs kólemine muwapıq belgilew huqıqı beriledi.
2025-jıl 1-iyuldan baslap medicina hám farmacevtika xızmetkerleri miynetine haqı tólewdiń óz aldına tártip hám de shártleri engiziledi.