Usı jıldıń 21-noyabr kúni Yaponiyalı alım, Awıl xojalıǵı ilimi doktorı, docent, topıraqtanıwshı ilimpaz Satoshi Togashi Taxtakópir rayonında bolıp, rayondaǵı mámleketlik Toǵay xojalıǵı xızmetkerleri qatnasıwında, Aralboyı xalqınıń bántligin támiyinlew hám dáramatın arttırıw maqsetinde «Cistanxe» ósimligin jetistiriw usılı boyınsha seminar ótkerdi.






Seminar dawamında qatnasıwshılar cistanxe ósimligin egiw, tárbiyalaw, jetistiriw usılları boyınsha kónlikpelerin asırıp, sertifikatlarǵa iye boldı.




Bunnan soń Yaponiyalı alım Satoshi Togashi rayon aymaǵındaǵı 9-sanlı ulıwma orta bilim beriw mektebinde bolıp, elimiz boylap dawam etip atırǵan «Jasıl mákan» ulıwma milliy joybarı sheńberinde mektep oqıwshıları menen birgelikte hár túrdegi miyweli hám dekorativ terek nállerin otırǵızıp, átirap aymaǵımızdı kóklemzarlastırıwǵa hám jasıl mákanǵa aylandırıwǵa óz úlesin qostı. Sonday-aq, mektep oqıwshıları menen birgelikte jasıl tábiyat kórinisi sáwlelegen súwretlew óneri tańlawın ótkerdi.






Maǵlıwmat ornında:
Cistanxe – Kıtay, Mongoliya hám Oraylıq Aziyada keń tarqalǵan ósimlik túri bolıp, tiykarınan shól hám yarım shól zonalarında ósedi. Bul ósimlik kóplegen keselliklerge, atap aytqanda, immunitetti bekkemlewde, buwınlardaǵı awrıwlar, nervtı tınıshlandırıwda oǵada paydalı dárilik ósimlik esaplanadı.
Maǵlıwmatlarǵa qaraǵanda xalıqaralıq bazarda 1 kilogramm cistanxe tuxımınıń bahası 3000 AQSh dollar, al 1 kilogramm tamırı bolsa 1000 AQSh dollarǵa shekem bahalanadı.