Búgin Taxtakópir rayonlıq Mádeniyat orayında rayondaǵı ulıwma orta bilim beriw mektep oqıwshıları arasında eń belsendi, eń ziyrek oqıwshılardı rayon sárdarları sıpatında saylaw hám balalardıń aktual joybarların keń jámiyetshilikke engiziw maqsetinde Ózbekstan balalar shólkeminiń «Balalar háreketi» rayon sárdarların saylaw ilajı ótkerildi.


Ilajda rayon hákiminiń orınbasarı Sh.Bekturǵanov sózge shıǵıp, búgingi kúnde jaslarǵa jaratılǵan imkaniyat hám sharayatlardan nátiyjeli paydalanǵan halda, teńleslerine úlgi bolarlıqtay jańa joybarlardı ámelge asırıwda jaslarǵa úlken isenim bildiretuǵınlıǵın atap ótti hám bárshe talabanlarǵa áwmet tiledi.




Bunnan soń, oqıwshılar ózleriniń tańlaǵan baǵdarları boyınsha óz joybarları menen qatnasıp, jasırın dawıs beriw jolı menen bas sárdar hám belgilengen baǵdarlar boyınsha 6 sárdar saylandı.

Saylaw juwamaǵında Jaslar isleri bólimi baslıǵı A.Nizamatdinov hám Ózbekstan balalar shólkeminiń juwapker xızmetkeri T.Abishovlar sárdarlardı qutlıqlap, olarǵa isenim jarlıqların tapsırdı hám aldaǵı oqıwlarında tabıslar tilep, sociallıq joybarlarda belsene qatnasıwǵa shaqırdı.

Ilaj rayonlıq mádeniyat bólimi tárepinen tayarlanǵan koncertlik baǵdarlamaları menen dawam etti.