Búgingi kúnde elimizde hayal-qızlardı qollap-quwatlaw, olarǵa bar múmkinshiliklerdi jaratıp beriw boyınsha bir qatar ámeliy jumıslar ámelge asırılıp atırǵan bolıp, bul baǵdarda kóplegen hayal-qızlar ózlerine jaratıp berilgen sharayatlardan nátiyjeli paydalanıp kelmekte.
Búgin Ózbekstan Respublikası Bas ministriniń orınbasarı, Shańaraq hám hayal-qızlar komiteti baslıǵı Z.Maxkamova, Qaraqalpaqstan Respublikası Ministrler Keńesi baslıǵınıń orınbasarı, Shańaraq hám hayal-qızlar komiteti baslıǵı M.Axmedovalar Taxtakópir rayonında boldı.



Dáslep, rayondaǵı «Ózbekstan» MPJ aymaǵında Mámleketlik Toǵay xojalıǵınıń jer fondı esabınan 10 hayal-qızǵa ajıratılǵan jer maydanında miyweli baǵ jaratıw hám nál jetistiriwdi jolǵa qoyıw boyınsha rayon hákimi J.Adilov basshılıǵında seminar shólkemlestirilip, hayal-qızlardıń ózin-ózi bánt etiwi hám ajıratılǵan jer maydanınan únemli paydalanǵan halda dáramat tabıwı boyınsha kórsetpeler berildi.


Bunnan soń kelgen miymanlar menen birgelikte ajıratılǵan jer orınǵa jaqsı niyetler menen dálepki miywe nálleri otırǵızıldı hám hayal-qızlarǵa sertifikatlar tapsırıldı.


Taxtakópir rayonı hákimliginiń málimleme xızmeti