Búgin Taxtakópir rayonlıq Mádeniyat bólimine qaraslı mádeniyat oraylarındaǵı háweskerlik xalıq jámáátleri hám dógerek aǵzaları tárepinen 2024-jıl «Jaslar hám biznesti qollap-quwatlaw jılı»nda alıp barǵan jumısları boyınsha «Talantlılar eliseń- Taxtakópirim» atamasında esabat beriw koncerti bolıp ótti.

Ilajda rayon hákiminiń orınbasarı, Shańaraq hám hayal-qızlar bólimi baslıǵı G.Seytnazarova, rayonlıq Mádeniyat bólimi baslıǵı S.Pirjanovlar sózge shıǵıp, 2024-jıl dawamında mádeniyat tarawındaǵı jańalanıwlar, háweskerlik jámáátleri hám de dógereklerge kóplegen jaslarımızdıń bántligin támiyinlew, talantlılardı izlep tawıp úlken sahnalarǵa alıp shıǵıw maqsetindegi alıp barılǵan nátiyjeli jumıslar sonday-aq, xalıqaralıq, respublikalıq tańlawlar hám festivallarǵa qatnasıp erisken joqarı nátiyjelerin maqtanısh etip tilge aldı.

Bunnan soń mádeniyat hám kórkem óner tarawında pidayılıq kórsetip kiyatırǵan taraw wákillerine, bir qatar jaslar hám olardıń ata-analarına minnetdarshılıq bildirilip, bayram sawǵaları tapsırıldı.

Ilaj rayonlıq Mádeniyat bólimine qaraslı mádeniyat oraylarındaǵı háweskerlik xalıq jámáátleri hám dógerek aǵzaları tárepinen tayarlanǵan koncertlik baǵdarlaması menen kóterinki ruwxta dawam etti.

Taxtakópir rayonı hákimliginiń málimleme xızmeti