Taxtakópir rayonı Mektepke shekemgi hám mektep bilimlendiriw bólimine qaraslı 2-sanlı ulıwma orta bilim beriw mektebinde «Jawızlıqqa qarsı aǵartıwshılıq» atamasında oqıwshı-jaslar menen taraw qánigeleri qatnasıwında ushırasıw ótkerildi.

Ashıq sáwbet tárizinde ótkerilgen ushırasıwǵa Ruwxıylıq hám aǵartıw orayı rayonlıq bólimi baslıǵı N.Azbergenov, Din isleri boyınsha komitettiń rayon boyınsha bas qánigesi I.Abdijamilov, rayonlıq IIB xızmetkeri, leytenant A.Tursınbaev, rayon hákimliginiń málimleme xızmeti baslıǵı N.Jarılqasinov, mekteptiń oqıtıwshı hám oqıwshı jasları qatnastı.

Ilajdı mektep direktorı G.Zarliqova kiris sóz benen ashıp, mektepte oqıwshı-jaslar ushın jaratılǵan imkaniyatlar sonday-aq, oqıwshı-jaslar arasında jınayatshılıq hám huqıqbuzarlıqlardıń aldın alıw boyınsha islenip atırǵan jumıslar boyınsha keńnen toqtalıp ótti.

Ushırasıw dawamında sózge shıqqanlar búgingi zamanagóy texnologiyalar ásirinde bilim hám aǵartıwshılıqtıń jámiyetti rawajlandırıwdaǵı áhmiyeti, jaslardı tárbiyalawdaǵı ornı hám olardı jawızlıqqa qarsı gúrese alatuǵınday shaxslar sıpatında tárbiyalaw zárúrligi haqqında aytıp ótildi.

Atap ótilgenindey, házirgi kúnde jas áwladtı hár tárepleme bilimli, mánawiyatlı, milliy qádiriyatlarımızǵa sadıqlıq ruwxında tárbiyalaw áhmiyetli wazıypalardan biri bolıp esaplanadı.

Ilaj dawamında oqıwshı-jaslar menen sáwbetlesip, olardıń pikir-usınısları tıńladı.

Taxtakópir rayonı hákimliginiń málimleme xızmeti