Awıl xojalıǵı maydanlarındaǵı qosımsha múmkinshiliklerden paydalanǵan halda ónim jetistiriwdi kóbeytip, dáramat tabıw maqsetinde, húrmetli Prezidentimizdiń 2024-jıl 30-dekabr kúni «Awıl xojalıǵı maydanlarındaǵı qosımsha múmkinshiliklerden paydalanǵan halda ónim jetistiriwdi kóbeytiwge tiyisli ilajlar haqqında»ǵı PQ-465-sanlı qararı qabıl etildi.

Usı qararǵa muwapıq, atız shetlerinde hám xalıqqa tiyisli qıytaq jerlerde, xojalıqlardıń hám kóp qabatlı úylerdiń aldı, máhálleniń ishki kóshelerinde awıl xojalıǵı ónimlerin jetistiriw sistemasın jetilistiriw boyınsha jańa tártip-qaǵıydalar engizilmekte.

Atap aytqanda, awıl xojalıǵı ónimlerin jetistiriwdi shólkemlestiriw boyınsha Ósimlikler karantini hám onı qorǵaw agentligine atız shetlerinde hám qıytaq jerlerde, xojalıqlarda hám kóp qabatlı úylerdiń aldında, máhálleniń ishki kóshelerinde ónim jetistiriw, awıl xojalıǵı subektlerine tuqım hám nállerdi jetkeriw hám jetistirilgen ónimlerdi eksportqa báǵdarlawdı shólkemlestiriw wazıypası júkletiledi.

Agentlik jıl dawamında tabısı joqarı bolǵan eginlerdi egiw hám olardı eksportqa shıǵarıw ushın miywe-palız ónimlerin eksport etiwshi isbilermenlerdiń talapların úyrenedi.

Atız shetlerinen nátiyjeli paydalanǵan awıl xojalıǵı ónimlerin jetistiriwshilerdi qollap-quwatlaw maqsetinde ishki fitosanitariya sertifikatı bir jıl dawamında biypul beriledi.

Atız shetlerine egilgen, “in-vitro” usılında jaratılǵan sabıw ushın arnalǵan miywe nállerin satıp alıw qárejetleriniń 50 procenti muǵdarında, biraq hár bir sabıw ushın arnalǵan miywe náline 25 mıń sumnan aspaǵan halda Agrosanaattı rawajlandırıw hám qollap-quwatlaw mámleketlik maqsetli fondınan belgilengen tártipte subsidiya ajıratıladı.

Qarardıń maqseti hám áhmiyetin atap ótetuǵın bolsaq, onda awıl xojalıǵına arnalǵan jer uchastkalarınıń, atızlardıń shetleri, kanallar, suwǵarıw hám kollektor-drenaj tarmaqlarınıń átirapındaǵı maydanlarda (jaǵalıq boyındaǵı aymaqlar oǵan kirmeydi), xalıqqa tiyisli qıytaq jer, xojalıqlar hám kóp qabatlı úylerdiń aldı, máhálleniń ishki kóshelerinde awıl xojalıǵı ónimleri jetistiriliwin nátiyjeli shólkemlestiriw hám kóbeytiw arqalı mámlekettiń eksportlıq kórsetkishlerin arttırıw názerde tutılǵan.

Qarardıń orınlanıuına nemquraylılıq penen qaraǵan, awıl xojalıǵı ónimlerin jetistiriwshi isbilermenlik subektlerine, huqıqıy hújjetke tiykarlanıp, olardıń barlıq awıl xojalıǵına arnalǵan jerleri ushın jer salıǵı stavkası úsh ese muǵdarında esaplanıwı, awıl xojalıǵın mámleket tárepinen qollap-quwatlaw fondınan belgilengen tártipte ajratılatuǵın jenilletilgen kredit resursları esabınan finanslıq támiyinlew toqtatılıwı xamde Agrosanoat kompleksi ústinen kadagalaw inspekciyası tárepinen bazalıq esaplaw muǵdarınıń on esesine shekemgi muǵdarda járiyma qollanılıwı haqqında keltirip ótilgen.

Bul óz gezeginde jer iyeleriniń juwapkershiligin arttırıw esesine dáramatlarınıń artıwına xızmet etedi.

“Ózagroinspekciya”nıń
Taxtakópir rayonı bólimi baslıǵı. A.Xojamuratov