Sońǵı jılları elimizde jaslarımızdı Watansúyiwshilik ruwxında tárbiyalap, olar arasında milliy qádiriyatlarımızdı keńnen en jaydırıw hám úgit-násiyatlaw baǵdarında kóplegen ruwxıy-aǵartıwshılıq ilajlar ámelge asırılıp kelinbekte. Bul bolsa, ósip kiyatırǵan jas áwlad wákilleriniń kámil insan bolıp jetilisiwinde oǵada áhmiyetli esaplanadı.
Usı tiykarda búgin, Taxtakópir rayonı «Dáwir» MPJ aymaǵındaǵı 5-sanlı mektepte rayonlıq Shańaraq hayal-qızlar bólimi, tiyisli shólkemler menen birgelikte «Qayın-ene hám kelin sırlasıwı» hámde «Gózzallıq-naǵıslar jılwasında» atamasındaǵı ruwxıy-aǵartıwshılıq ilajların shólkemlestirdi.
Ilajǵa Ózbekstan Respublikası Prezidenti Administraciyası tárepinen dúzilgen arnawlı isshi topar wákili Baxtiyor Saidkosimov, «Dáwir» máhálle baslıǵı B.Kamalov, rayonlıq Ishki isler bóliminiń hayal-qızlar máseleleri boyınsha aǵa inspektorı, kapitan B.Baxieva hám aymaqtıń belsendi hayal-qızları menen jasları qatnastı.
Ilaj mektep oqıwshıları hám belsendi hayal-qızlar tárepinen tayarlanǵan tárbiyalıq hám xalqımızdıń milliy salt-dástúrlerin sáwlelendiriwshi saxnalıq kórinisleri, sonday-aq rayonlıq mádeniyat bóliminiń koncert baǵdarlaması menen kewilli dawam etti.
Taxtakópir rayonı hákimliginiń málimleme xızmeti