«Ásker anaların qádirleymiz!» atamasında videobaylanıs ilajı ótkerildi

Ózbekstan Respublikası Qurallı Kúshleri dúzilgeniniń 33 jıllıǵı hám 14-yanvar – Watan qorǵawshıları kúni múnásibeti menen Taxtakópir rayonında azamatlıq wazıypasın ótep atırǵan múddetli áskeriy xızmetkerler ushın jaqınları arasında videobaylanıs ilajı shólkemlestirildi.

Ilajda sózge shıqqanlar áskeriy xızmet hár bir el azamatı ushın tek ǵana ullı wazıypa emes, al sadıqlıq hám mártlik mektebine aylanǵanlıǵın atap ótip, bársheni bayram menen qutlıqladı.

Videobaylanıs arqalı áskerler ózleriniń xızmet orınları, áskeriy bólimdegi turmısı hám jaratılǵan sharayatlar haqqında jaqınlarına aytıp berdi. Sonday-aq, olar óz máhállelerindegi sońǵı jańalıqlar, shańaraq jaǵdayları hám doslarınıń jaǵdayı menen qızıqtı.

Ilaj dawamında qatarlaslarına órnek bolıp kiyatırǵan áskerlerdiń ata-analarına arnawlı minnetdarshılıq xatı saltanatlı jaǵdayda tapsırıldı.