Taxtakópir rayonı hákimliginiń májilisler zalında máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw máseleleri boyınsha jıynalıs bolıp ótti.

Onda rayon hákiminiń orınbasarı Sh.Bekturǵanov, Mámleketlik qáwipsizlik xızmeti rayonlıq bólimi baslıǵınıń orınbasarı Z.Eshchanov, Qaraqalpaqstan Respublikası jınayat isleri boyınsha Taxtakópir rayonı sudınıń tergew sudyası F.Ibragimov, sonday-aq, Milliy gvardiya xizmetkerleri, máhálle baslıqları menen Mektepke shekemgi hám mektep bilimlendiriw tarawı wákilleri qatnastı.

Májilis dawamında sózge shıqqanlar tárepinen Ózbekstan Respublikası Prezidentiniń 2025-jıl 3-yanvar kúngi PQ-1-sanlı qararınıń mazmun-mánisi tusindirilip, máhállelerinde qáwipsiz ortalıqtı jaratıw, oqıwshı-jaslar arasında ushırasatuǵın huqıqbuzarlıqlardıń erte aldın alıw, sonday-aq, jaslar arasında ruwxıy-aǵartıwshılıq jumıslardı sistemalı túrde alıp barıw zárúr ekenligi atap ótildi.

Sonıń menen bir qatarda, ayırım bilimlendiriw orınlarda oqıwshı-jaslar arasında jınayatshılıq hám huqıqbuzarlıqlar ushırasıp atırǵanlıǵı hám oǵan qarsı gúresiw boyınsha profilaktikalıq úgit-násiyatlaw jumısları alıp barmaǵanlıǵı, sonday-aq, huqıqbuzarlıqlarǵa nemquraylılıq penen qaraǵan taraw basshılarına eskertiwler berildi.

Taxtakópir rayonı hákimliginiń málimleme xızmeti