Ózbekstan Respublikası Ministrler Kabinetiniń 2025-jıl 22-yanvardaǵı “Topıraq monitoringin ámelge asırıw hám topıraqtıń ónimdarlı qatlamın anıqlaw tártibin jetilistiriw ilajları haqqında»ǵı qararı qabıl etildi.

Usı qararǵa muwapıq, Ózbekstan Respublikasınıń «Topıraqtı qorǵaw hám onıń ónimdarlıǵın arttırıw haqqında»ǵı Nızamına muwapıq, respublikada klimat ózgeriwi menen baylanıslı unamsız tásirlerdiń aldın alıw, awıl xojalıǵı jerleri degradaciyasın azaytıw, topıraqtaǵı gumus muǵdarın asırıw arqalı eginlerdiń zúráátliligin hám topıraq ónimdarlıǵın jaqsılaw maqsetinde jańa tártip-qaǵıydalar engizilmekte.

Atap aytqanda, Ózbekstan Respublikasınıń «Topıraqtı qorǵaw hám onıń ónimdarlıǵın arttırıw haqqında»ǵı Nızamınıń 10-statyasına muwapıq topıraq monitoringin ámelge asırıw tártibi belgilengen.

Topıraq monitoringin ámelge asırıw, Ózbekstan Respublikası Awıl xojalıǵı ministrliginiń Topıraqtanıw hám agroximiyalıq izertlewler institutı hám onıń aymaqlıq bólimleri tárepinen ámelge asırılıwı belgilengen.

Topıraqtanıw hám agroximiyalıq izertlewler institutı tárepinen topıraqtıń házirgi jaǵdayı, júz berip atırǵan ózgerislerdi analizlew, bul ózgerislerdiń xarakteri hám olardıń topıraq ónimdarlıǵına tásirin anıqlaw, unamsız processlerdiń aldın alıw hám olardı saplastırıw boyınsha rejeler hám usınıslar islep shıǵıwdı, topıraq monitoringin múlkshilik túrine qaramastan awıl xojalıǵında paydalanılatuǵın jerlerdiń barlıq túrleri boyınsha ámelge asırıw, topıraq monitoringi dawamında tańlap alınǵan topıraq úlgileri milliy hám xalıqaralıq akkreditaciya sistemasındaǵı akkreditaciyalanǵan laboratoriyalarda analiz etiw wazıypası júklendi.

Qarardıń maqseti hám áhmiyetin atap ótetuǵın bolsaq, onda laboratoriya analizlerin ótkeriw, topıraq kartasın avtorlıq túp nusqasın dúziw, topıraqtıń ónimdarlı qatlamın esaplaw, maǵlıwmat xatın jazıw hám topıraq kartasına keńeytilgen túsindirmeler dúziw názerde tutılǵan.

Sonday-aq, topıraqtıń ónimdarlı qatlamı boyınsha juwmaq 3 nusqada tayarlanadı. Birinshisi institut arxivinde saqlaw ushın, ekinshi nusqa múrájat iyesi isbilermenlik subekti orınlawı ushın, úshinshi nusqa Ministrler Kabineti janındaǵı Agrosanaat kompleksi ústinen qadaǵalaw inspekciyasına mámleketlik qadaǵalawdı ámelge asırıw maqsetinde jiberiledi.

Usı qarar tiykarında Ministrler Kabineti janındaǵı Agrosanaat kompleksi ústinen qadaǵalaw inspekciyasına qala qurılısı jumısı, geologiyalıq-izlew hám paydalı qazılmalardı qazıp alıw, sonday-aq, awıl xojalıǵına tiyisli bolmaǵan basqa da baǵdarlardaǵı jumıslardı ámelge asırıwshı joybar orınlawshıları tárepinen topıraq katlamınıń súrip alınıwı hám belgilengen dala konturındaǵı kóshirilgenligi tuwralı qadaǵalawdı ámelge asırıw wazıypası júklengenligi maǵlıwmat retinde bildiriledi.

Inspekciyanıń Taxtakópir rayon bólimi bas qaniygesi
T.Nısanov