Ózbekstan Respublikasınıń ayırım nızam hújjetlerine shaxstıń huqıq hám erkinliklerin isenimli qorǵaw kepilliklerin ele kúsheyttiriwge qaratılǵan ɵzgeris hám qosımshalar kirgiziw haqqındaǵı 28.01.2025-jıl 28-yanvar kúngi Ózbekstan Respublikası Nızamına tiykar ayırım nızam hújjetlerine ózgerisler hám qosımshalar kirgizildi.

Oǵan bola, tergew sudyaları tárepinen jınayat isleri boyınsha sudqa shekemgi is júrgiziw basqıshında processuallıq qararlarǵa sankciya beriw hám hákimshilik huqıqbuzarlıqlar haqqındaǵı islerdi kórip shıǵıw máselelerin nızamshılıqta belgilew maqsetinde tergew sudyalarınıń wákillikleri qatarına kirgizilgen islerdi kórip shıǵıw tiykarları hám tártibin názerde tutatuǵın ózgerisler hám qosımshalar kirgizildi.

Jınayat-processual kodeksine kirgizilgen ózgeris hám qosımshalarǵa bola, tergew sudyasınıń wákillikleri belgilenip, tergew sudyası jeke ózi jumıs alıp barıp, Kodekste názerde tutılǵan tártipte sudqa shekemgi is júrgiziw basqıshında shaxstıń huqıqları, erkinlikleri hám nızamlı máplerine ámel etiliwi ústinen sud qadaǵalawın ámelge asıradı.

Sonday-aq, tintiw ótkeriw haqqında iltimasnama qozǵaw hám onı kórip shıǵıw tiykarları belgilendi.

Bunda, tintiw ótkeriw ushın tiykarları bar bolǵanda prokuror, tergewshi yaki sorastırıwshı tintiw ótkeriw haqqında iltimasnama qozǵaw haqqında onı ótkeriw ushın tiykarlardı bayan etken halda qarar shıǵaradı.

Telefonlar hám basqa da telekommunikaciya qurılmaları arqalı alıp barılatuǵın sóylesiwlerdi esitip turıwdı, olar arqalı uzatılatuǵın málimlemeni alıwdı ámelge asırıw haqqındaǵı ótinishti kórip shıǵıw tiykarları belgilendi.

Bunnan tısqarı, múlkti xatlaw haqqındaǵı iltimasnamanı kórip shıǵıw tártibi belgilendi.

Bunda, múlkti xatlaw haqqındaǵı iltimasnama sorastırıw yamasa dáslepki tergew júrgizilip atırǵan orındaǵı jınayat isleri boyınsha rayon (qala) sudınıń tergew sudyası tárepinen jeke tártipte kórip shıǵıladı.

Zuxra Bayımbetova
Jınayat isleri boyınsha Xojeli rayonı sud tergew sudyası