Húrmetli Prezidentimizdiń 2025-jıl 14-fevraldaǵı «Jaslar isbilermenligin rawajlandırıw hám bántligin támiyinlewge baylanıslı qosımsha is-ilajlar haqqında»ǵı PQ-62-sanlı qararına muwapıq AK “Aloqabank”, qala hám rayon hákimliklerine bir qatar wazıypalar belgilep berilgen.

Sonday-aq, jaslardıń isbilermenlik baslamaların qollap-quwatlaw, isbilermenlik kónlikpelerin rawajlandırıw, jas isbilermenlik subektleriniń ekonomika tarmaqları hám tarawlarındaǵı, sonıń ishinde, startap hám innovaciyalıq joybarların ámelge asırıwǵa járdemlesiw, kásip-óner, sanlı texnologiyalar jáne shet tillerin tereń iyelewi ushın qosımsha sharayatlar jaratıw, sonday-aq, jaslardıń bántligin támiyinlew maqsetinde jas isbilermenlerge kompleksli xızmetler kórsetiw, olardıń jumısın qarjılay qollap-quwatlaw baǵdarında AK “Aloqabank”ti tayanısh “jaslar banki” etip belgilengen.

Joqarıda belgilep berilgen wazıypalardıń orınlanıwın támiyinlew maqsetinde, búgin Taxtakópir rayonı hakimliginiń májilisler zalında AK “Aloqabank” Qaraqalpaqstan Aymaqlıq kompleks xızmetler kórsetiw orayınıń tiyisli wákilleri hám rayonımızda isbilermenlik penen shuǵıllanıp atırǵan hám de shuǵıllanıw niyetindegi jaslar qatnasıwında ushırasıw ótkerildi.

Ushırasıw dawamında tiyisli taraw wákilleri tárepinen isbilermenlik penen shuǵıllanıwdı qálewshi jaslar ushın 100 den aslam biznes jónelisleri, sonday-aq jeńilletilgen kredit túrleri boyınsha maǵlıwmatlar berip ótti.

Bunnan soń jaslar da ózleriniń biznes joybarları hám usınısları menen bólisip, qızıqtırǵan sorawlarına juwaplar aldı.