13-mart-qazaq xalqınıń  «Kórisiw-amal merekesi» kúni

Sáne múnásibeti menen búgin Taxtakópir rayonı orayınan alıs aymaqta jaylasqan «Qońıratkól» awıl puqaralar jıyınıda «Amal keldi – jıl keldi» atamasında bayram ilajı ótkerildi.

Ilajǵa rayon hákiminiń orınbasarı, Shańaraq hám hayal-qızlar bólimi baslıǵı G.Seytnazarova, rayonlıq IIB niń hayal-qızlar máseleleri boyınsha aǵa inspektorı, kapitan B.Baxieva xalqın qatnasıp, awıl xalqın 13-mart-qazaq xalqınıń Amal-kórisiw kúni merekesi menen qızǵın qutlıqladı.

Bayram ilajı aymaqtaǵı mektep hám mektepke shekemgi shólkem, sonday-aq belsendi hayal-qızlar tárepinen tayarlanǵan milliy sahnalıq kórinisler, ayaq oyın, milliy qosıq atqarıwshılıǵı hám basqa da kewilashar ilajalar menen kóterinki ruwxta belgilendi.

Maǵlıwmat orınında aytatuǵın bolsaq, Bul bayram ázelden milletler aralıq tatıwlıq, jaslardı óz-ara doslıq, keńpeyillik ruwxında tárbiyalaw, kem támiyinlengen shańaraqlardı ruwxıy hám materiallıq jaqtan qollap-quwatlaw qádiriyatların ózine qamtıp alǵan bayram desek boladı. Sebebi, usı kúni ata-babalarımız qıstan aman-esen shıqqanına quwanıp, usı sánede barlıq awıl-aymaq bas qosıp bul merekeni bayramlaǵan.

Mine, sonlıqtan usı kúni qazaq xalqı bir-biri menen  qushaq ashıp kórisip, elge kirip kelgen jańa jıl menen bir-birin qutlıqlaydı. Jaqsı tilekler aytıp, ótken jıldan qalǵan ókpe-giyne, qapashılıqlardı umıtıp, bul kúndi bayram sıpatında keń túrde bayramlaydı.