Ózbekstan Respublikası Prezidenti tárepinen 2025-jıl 30-yanvar kúni «Puqaralar hám isbilermenlik subektleriniń huqıqların sud arqalı qorǵalıwınıń zamanagóy mexanizimlerin engiziw boyınsha qosımsha is-ilájları haqqında»ǵı PQ-33-sanlı Qararınıń mazmunı haqqında sóz.

Sońǵı jıllarda mámleketimizde mámleketlik uyımlar menen qatnasıqlarda puqaralar hám isbilermenlik subektleriniń huqıqların nátiyjeli qorǵalıwın támiynlewde sistemalı reformalar ámelge asırıldı.
Ásirese, 2017 jılda mámleketimiz tariyxında birinshi mártebe hákimshilik sudlar shólkemlestirilgenligi puqaralar hám isbilermenlik subektleriniń nızamǵa muwapıq emes qararları, háreketleri ústinen sudqa shaǵım etiwge baylanıslı konstituciyalıq huqıqların támiynlewde áhmiyetli qádem boldı.
Ótken dáwirde hákimshilik sudlar tárepinen kórip shıǵılǵan 120 mıńǵa jaqın arza hám shaǵımlardıń 57 payızı qanaatlantırılıp, puqaralar hám isbilermenlik subektleriniń buzılǵan huqıqları tiklengenligi hám hákimshilik sudlardıń nızam ústinligin támiynlew hámde shaxstıń huqıq hám erkinliklerin isenimli qorǵawda áhmiyetli institut sıpatında sáwlelengenligin kórsetpekte.
Bul boyınsha hákimshilik sudlar wákilligine shaǵımlardı kórip shıǵıwda «aktiv qatnasıw» principi tiykarında dawdı tuwrı sheshiw ushın dáliyllerdi ǵárezsiz jıynaw minnetlemesi júklengenligi, sud qararı orınlanıwın táminlemegen lawazımlı shaxslarǵa járiyma qollaw wákilligi berilgeni hám usı institut jedellesip baratırǵanlıǵınan dáliyl beredi.
Sonıń menen birge, búgingi kúnde hákimshilik sudlar iskerliginde aldıńǵı sırt el tájiriybeside ózin aqlaǵan institut hám tártiplerdi keń qollaw arqalı puqaralar hám isbilermenlik subektleriniń huqıq hám nızamlı máplerin qorǵawda usı sudlardıń rolin asırıw, sonnan mámleket uyımı hújjetine isenip iskerligin júritken puqaralar hám isbilermenlik subektleri huqıqları hám nızamlı mápleriniń qorǵalıwın qosımsha ráwishte kúsheytiriw zárúrligi payda boldı.
Usılarǵa tiykar, 2025-jıl 30-yanvar kúni jurtbasshımız tárepinen «Puqaralar hám isbilermenlik subektleriniń huqıqların sud arqalı qorǵalıwınıń zamanagóy mexanizimlerin engiziw boyınsha qosımsha is-ilájları haqqında»ǵı PQ-33-sanlı Qararı qabıl etildi.
Bul qarar menen mámleketimizde ádalat hám nızam ústinligi reformaların rawajlanıwdıń eń baslı hám zárúr shártine aylandırıwdıń tiykarǵı maqsetlerinen biri hákimshilik sudlarda lawazımlı shaxslardıń qararları ústinen berilgen shaǵımlardı kórip shıǵıw sistemasın jetilisitiriw arqalı sud baqlawın qollaw tarawın keńeytiriw názerde tutılǵan.
Ózbekstan Respublikası Prezinetiniń 2023-jıl 16-yanvardaǵı PF-11-sanlı Pármanı menen tastıyıqlanǵan 2023-2026-jıllarǵa mólsherlengen sud sisteması sıpat jaǵınan jańa basqıshqa alıp shıǵıwdıń qısqa múddetli strategiyasın ámelge asırıw boyınsha háreketler dástúrinde huqıqtı qollaw ámeliyatın kritikalı túrde analizlew tiykarında hámde aldıńǵı sırt el tájiriybeni inábatqa alǵan halda hákimshilik sud is júritiwin jedellestiriw sharaların kóriw belgilengen.
«Ózbekstan – 2030» strategiyasında da mámleketlik uyımları hám lawazımlı shaxslardıń iskerligi ústinen nátiyjeli sud baqlawın ornatıw hámde hákimshilik ádillik sistemasın jánede rawajlandırıwǵa baylanıslı wazıypalar belgilendi.

Qaraqalpaqstan Respublikası
hákimshilik sudı sudyası G.Baynazarova