Taxtakópir rayonında ámelge asırılıp atırǵan reformalardıń orınlanıwı sıpatında jańadan jumıs baslaǵan isbilermenlik obektlerine Qaraqalpaqstan Respublikası Joqarǵı Keńesi deputatı, «Ǵárezsizlik» MPJ baslıǵı A.Alliyarova, jergilikli deputatlar, máhálledegi hákim járdemshileri hám ǵalaba xabar quralları wákilleriniń qatnasıwında media-tur shólkemlestirildi.


Media-tur qatnasıwshıları dáslep, «Qaraoy» APJ aymaǵındaǵı «Kausar Tegirmon» juwapkershiligi sheklengen jámiyeti tárepinen shɵlkemlestirilgen sharwashılıq kompleksi menen tanıstı hám dáslepki maǵlıwmatlarǵa iye boldı.
Atap ótiw orınlı, «Kausar Tegirmon» JShJ kárxanası tárepinen ulıwma bahası 95,6 mlrd.sumlıq ǵálle klasterin shınjırlı sistema tiykarında shɵlkemlestiriw yaǵnıy, un islep shıǵarıw, júndi qayta islew, sharwashılıqtı rawajlandırıw hám sútti qayta islew joybarların ámelge asırıw hám jańadan 115 jumıs ornı jaratılıwı belgilengen.



Búgingi kúnde “Qaraoy” APJ aymaǵındaǵı sharwashılıq kompleksinde 120 bas násilli qaramallar alıp kelinip, kútimli baǵılmaqta. Bul sharwa komplekste 15 jumıs ornı jaratılǵan bolıp, kúnlik 300 litr sút ɵnimleri sútti qayta islew cexına jiberiledi.

Media-tur qatnasıwshılarınıń ekinshi mánzili «Ǵárezsizlik» MPJ aymaǵındaǵı «Kausar Tegirmon» JShJ tárepinen «Sútti qayta islew» cexı boldı.

Kárxana jılına 100 tonna sút ɵnimlerin islep shıǵarıw quwatlıǵına iye bolıp, búgingi kúnde sútti qayta islew arqalı 5 túrdegi yaǵnıy, qaymaq, qatıq, sút, smetana, yogurt hám tvorog islep shıǵarılmaqta.

Ulıwma bahası 700 mln.sumlıq joybar sheńberinde jańa jumıs orınları jaratılıp, aymaq turǵınlarınıń bántligin támiyinlewge erisildi.

Media-tur qatnasıwshıları ilaj dawamında qánigelerden ózlerin qızıqtırǵan sorawlarǵa juwap aldı.

Taxtakópir rayonı hákimliginiń málimleme xızmeti