«Mámleketlik bajı haqqında»ǵı Nızamǵa kiritilgen sońǵı ózgerisler

Ózbekstan Respublikası «Mámleketlik bajı haqqında»ǵı Nızamǵa qosımsha hám ózgerisler kiritiw haqqında 2025-jıl 20-fevral kúni 1032-sanlı Nızamı qabıl etildi.

Keyingi jıllarda mámleketimizde energiya resurslarınan aqılǵa urǵas hám nátiyjeli paydalanıwǵa, ekonomikanı jedel rawajlandırıw ushın zárúr bolǵan energiyanıń sarplanıwın turaqlastırıwǵa hámde Ózbekstan Respublikası aymaǵında shet el komeerciyalıq shólkemleriniń wákilxanaların akkreditaciya qılıwdı ápiwayılastırıwǵa qaratılǵan reformalar ámelge asırılmaqta.

Biraq energiya resusrları tutınıwshıları tárepinen tólew intizamı dárejesiniń pásligi ıssılıq hám elektr energiyasın jetkerip beriwshilerdiń finans kórsetkishlerine keri tásir kórsetpekte.

Sonlıqtan ıssılıq hám elektr energiyasın jetkerip beriwshiler tárepinen tutınıwshılarǵa energiya resursları turaqlı jetkerip beriliwin hámde sıpatlı xızmetler kórsetiliwin támiynlew ushın jetkizip berilgen energiya ushın tólew boyınsha qarızlardı óz waqtında óndiriw zárúrligi júzege kelmekte.

Bunnan tısqarı, «Mámleketlik bajı haqqında»ǵı Ózbekstan Respublikası Nızamında shet el kommerciyalıq shólkemleriniń wákilxanaların akkreditaciya qılǵanlıq ushın mámleketlik bajı tóleniwi názerde tutılmaqta. Sonıń menen birge akkreditaciyanıń qaysı dáwiri ushın mámleketlik bajı tóleniwi anıqlastırılmaqta.

Usı nızam menen «Mámleketlik bajı haqqında»ǵı Ózbekstan Respublikası Nızamına tiyisli ıssılıq hám elektr energiyasın jetkerip beriw júzesinen xızmetler ushın tólemler boyınsha qarızlardı óndiriw haqqındaǵı dawalar, arzalar hám shaǵımlar menen puqaralıq isleri boyınsha hám ekonomikalıq sudlarǵa múrájat etilgende ıssılıq hám elektr energiyasın jetkerip beriwshiler mámleketlik bajını tólewden azat etiliwin, sonday-aq olardıń talapların qanaatlandırıw tolıq yaki qısman bas tartılǵanda bul mámleketlik bajını usı jetkerip beriwshilerden óndiriw imkániyatın názerde tutıwshı qosımsha hám ózgerisler kiritilmekte. Sonday-aq shet el kommerciyalıq shólkemleriniń wákillikxanaların Ózbekistan Respublikası aymaǵında akkreditaciya qılıwda mámleketlik bajını tólew hár bir jıl ushın ámelge asırılıwın anıqlastırıwshı ózgeris kiritilmekte.

Bul nızam tutınıwshılar tárepinen qarızlardıń óz waqtında tóleniwin támiynlewge, xalıqtıń sıpatlı ıssılıq hám elektr energiyasın jetkerip beriw boyınsha xızmetler menen támiynlengenlik dárejesin asırıwǵa, sonday-aq shet el kommerciyalıq shólkemleriniń wákilxanaların Ózbekstan Respublikası aymaǵında akkreditaciya qılǵanlıq ushın mámleketlik bajı tólew tártibin anıqlastırıwǵa xızmet qıladı.

Qaraqalpaqstan Respublikası hákimshilik sudı sudyası
G.Baynazarova